शारदीय नवरात्रोत्सव – अष्टमी प्रसाद

महाराष्ट्रात प्रसिद्ध असलेल्या साडेतीन शक्तीपीठांपैकी कोल्हापूर हे पूर्णपीठ असून आद्य शक्तीपीठ आहे. त्यामुळे भाविकांसाठी हे पूज्य तीर्थक्षेत्र आहे. प्राचीन काळापासून शक्तीच्या उपासनेला फार महत्व आहे. अशा या शक्तिदेवतेचा उत्सव म्हणजे नवरात्रोत्सव होय. देवीची उपासना करण्याचा हा महत्वाचा कालावधी मानला जातो. कोल्हापूर येथे नवरात्र खूप मोठ्या प्रमाणात आणि उत्साहात साजरे केले जाते. देशभरातून लाखो भाविक देवीच्या दर्शनासाठी कोल्हापूरमध्ये येतात. नऊ दिवसांचा हा उत्सव सोहळा असतो. या उत्सवात श्री महालक्ष्मी अन्नछत्र सेवा ट्रस्टचा खूप मोठा सहभाग असतो. या काळात देवीचे दर्शन घेतल्यानंतर भोजनप्रसाद घेण्यासाठी भाविकांचे पाय आपोआपच अन्नाछ्त्राकडे वळतात. दररोज ८ ते १० हजार भाविक भोजनासाठी येत असल्यामुळे अन्नछत्राची वेळ २ तासाने वाढविली जाते. एवढी गर्दी असूनही येथे सर्व भाविकांना चविष्ट व सात्विक भोजन दिले जाते.

याशिवाय नवरात्रात अष्टमी दिवशी श्री अंबाबाई नगरप्रदक्षिणेला बाहेर पडते. यावेळी या मार्गावर दर्शन घेण्यासाठी भाविकांची खूप गर्दी असते. या निमित्ताने सर्व भाविकांना श्री महालक्ष्मी अन्नछत्र सेवा ट्रस्ट कडून मोफत प्रसादाचे वाटप करण्यात येते. दरवर्षीप्रमाणे या वर्षीही अतिशय भक्तिपूर्ण व प्रसन्न वातावरणात उपस्थित सर्व भाविकांना संस्थेतर्फे प्रसादाचे वाटप करण्यात आले. प्रसाद ग्रहण केल्यावर भाविकांनी समाधानाने संस्थेचे आभार मानले . यावेळी संस्थेचे सर्व पदाधिकारी व इतर मान्यवर उपस्थित होते.